KUCHING, 9 Mei: Kunsil Nengeri (DUN) Sarawak sehari tu udah ngemendarka dua Rang Undang-Undang (RUU) Bajet Tambah sepenyampau RM514,002,003 dikena nambahka agih belanja sebedau tu.
Kedua-dua RUU ke dibantai Sapit Premier Sarawak, Datuk Amar Douglas Uggah Embas ke mega Menteri Pekara Wang enggau Ekonomi Baru II nerima sukung penuh ari kaban DUN.
RUU Bajet Tambah (2023) sepenyampau RM267,928,353 enggau RUU Bajet Tambah (2024) manggai RM246,073,650.
Kenu ku Uggah, nya mega dikena mayar kos bemacham servis ke ditanggung sekeda opis menteri enggau opis perintah ke nadai chukup belanja baka ke dianggar taun 2023.
“Kelimpah nya, RUU Bajet Tambah (2024) bisi minta belanja tambah, antara nya, penyampau RM112,486,000 ke diguna Opis Premier Sarawak.
“Sepenyampau RM78,000,000 diguna Opis Menteri Nembiak, Lumba enggau Pemansang Dagang Sarawak dikena mayar atur Lumba Malaysia (SUKMA) 2024 enggau sepenyampau RM16,049,000 diguna ungkup ngatur Para SUKMA,” ku iya.
Iya mansutka pekara nya maya mantaika RUU Bajet Tambah (2023) enggau RUU Bajet Tambah (2024) maya Aum DUN Sarawak ditu, tadi.-TVS