PADAWAN, Julai 2 : Dua ari empat iku orang dijil ti ngelarika diri ari Penjara Puncak Borneo mujur ditangkap .
Ku Sapit Tuai Polis Pelilih Padawan, DSP Lim Jaw Shyong madah, sida nerima ripot ari Pegawai Penjara Puncak Borneo maya 1 haribulan tujuh 2021 urung pukul 9.14 malam.
Lalu siti keretas tasat udah dibuka ba baruh Seksyen 223/224 Kanun Keseksaan.
Ku iya, kes nya nyadi maya 1 haribulan tujuh urung pukul 5.11 lemai iya nya empat iku orang dijil ngelari kediri ari palan transit penerimaan penjara nengah jenila jamban ba bilik besai terus lari ke kampung.
“Berindik ari nya, operasyen ngiga udah dipejalaika raban penjara sepengudah penusah nya nyadi. IPD Padawan mega udah bejalaika OPS TUTUP ba sekeda endur dikena nagang saspek nya ari lari ngagai endur ke buka,” ku iya ba siti penerang saritu.
“Nangkanka nya, operasyen ngiga sida ke lari tu mega benung chakah dipejalai enggau semua ke pengulih IPD enggau raban bantu ari Tiger Platun, Raban Gerakan Am Briged Sarawak.”
Raban pengatur jil udah mujur nangkap baru dua ari empat orang ke dijil ti ngelarika diri nya kemari.
Operasyen agi dipejalaika dikena nangkap dua saspek ke agi lepas. Mensia mayuh ti bisi penerang tau ngangau Bilik Gerakan Indu Opis Pelilih padawan ba tali arus 082-862 233.
