KUCHING, 15 Jun: Menteri ba Opis Premier Sarawak, Datuk John Sikie Tayai nyukung langgur penemu Sapit Premier sarawak, Datuk Amar Douglas Uggah Embas ti merambu deka ngatur seminar ngepan Iban dalam taun tu.
Ku iya, seminar nya endang patut diatur nyadika pelasar dikena narak penemu pasal ngepan Iban enggau ngelala rurun tusun ngena ngepan iban ti betul.
“Nyadi enti kitai meda ba ngepan orang indu bisi beberapa bansa, bepun ari sugu tinggi nyentuk ke lanting kaki.
“Nyangka agi mayuh bala enda nemu tauka nyengala mereti pasal tusun pekayan nya tadi.
“Nya alai, perambu ngatur seminar nya dipeda aku chukup manah ungkup kitai di Sarawak,” ku iya.
Sikie ke mega Kaban Kunsil Nengeri ADUN Kakus madah munyi nya maya dirandau TVS lebuh Hari Dua.
Berebak enggau nya, Sikie madah diri suah meda pekayan Iban Sarawak dirasuk bechampur enggau ngepan Dayak ari menua sepiak Kalimantan (Indonesia).
Nya alai, ari seminar ti deka diatur iya ngarapka mensia mayuh lebih mereti enggau nemu bida bagi ngepan ke asal enggi Sarawak.
Udah nya, Sikie madah nengah seminar ke deka datai mega iya ngarapka nya ulih mantu raban pedagang ngelala peluang dikena ngerembaika dagang sida.
Ku iya, produk pekayan tradisonal Iban ba makit dagang kraf diatu majak nerima peminta ke tinggi sereta ngembuan tikas komersial.
“Nyadi aku ngarap bala kelebih agi ke ngaga pekayan Iban, baka sida ke betenun patut ngeluarka produk tu mayuh agi.
“Kebuah pia laban diatu deka ngiga ngepan ke tulin chukup pedis, sampai bisi nyau begiga nyentuk ke Lubok Antu tegal ti deka ngiga kereban ngepan ke tulin,” ku iya.-TVS
