BETONG, 12 Feb: Pengerami Taun Baru China ke diintu nyerumba taun naga serak tu dikearapka terus mai pengelantang ngagai rayat di nengeri tu.
Sapit Premier Sarawak, Datuk Amar Douglas Uggah Embas madah tu nyata dipeda rambau Pengerami Ngelaluka Pengabang Taun Baru China 2024 di Palan Konvensyen Borneo (BCCK) empai lama digulu mayuh pupu bansa enggau pengarap.
“Taun tu taun naga nyadi aku meda pengerami taun tu chukup richah lebih agi maya pengerami renggat nengeri di BCCK ke bisi digulu Tuai Pemegai Menua (TYT) Nengeri Sarawak (Tun Dr Wan Junaidi Tuanku Jaafar) enggau Premier Sarawak (Datuk Patinggi Tan Sri Abang Johari Tun Openg).
“Chukup mayuh rayat datai enda ngira bansa enggau pengarap lalu nya mandangka nengah siti pengerami kitai ulih ngempung rayat.
“Kitai ditu udah chukup mereti adat lalu ngarapka penatai taun baru ulih mai pengaya ngagai semua rayat Sarawak,” ku iya.
Iya ke mega Kaban Kunsil Nengeri (ADUN) Bukit Saban madah munyi nya pengudah ngabang ngagai Rumah Kaunselor Walter Chang ba Spaoh pagi tadi.
Dulu ari nya, Uggah enggau bini iya, Datin Amar Doreen Mayang bisi ngabang ngagai sekeda rumah Tuai Genturung Pendiau enggau Tuai Raban Bansa (KMKK) bansa Tiong Hua ba Spaoh.
Sama bisi nyereta pejalai ngabang nya Kaban Parlimen Betong, Dr Richard Rapu, Sekretari Politik ngagai Premier Sarawak, Roselind Mapong Sabai enggau ke bukai.-TVS
