MIRI, 21 April: Perintah Sarawak dijangka deka berengkah ngatur sempekat jual beli sereta ngempu serikat penerebai MASWings Sdn Bhd (MASWings) ba tengan taun tu.
Menteri Pengangkut Sarawak, Dato Sri Lee Kim Shin madah raban sida benung meresa sekeda pekara sebedau setuju ngempu serikat nya ari Perintah Besai enggau Malaysia Airlines.
“Semua kitai sama nemu kitai benung ba atur ngempu penerebai MASWings.
“Kitai agi dalam proses meresa sekeda sukut baka pekara wang, undang-undang enggau teknikal.
“Lebuh semua udah tembu, kitai udah setuju, Perintah Besai enggau sida Malaysian Airlines setuju, udah nya kitai deka ngatur siti sempekat jual beli.
“Arapka dikemujur tengan taun tu ngambi kitai ulih ngadu sempekat nya mih,” ku iya.
Iya madah munyi nya maya Pengerami Rumah Tebuka Aidilfitri diatur Gerempung Melayu Miri (PMM), Hari Minggu.
Kim Shin mega nangkan raban pengatur pengawa ba padang bilun Kuching enggau Miri negapka agi tikas pemeresi lebih agi agu ungkup pengelantang penumpang.
Ku iya, padang bilun endang perengkaguna ke chukup beguna mesti diadu manah ungkup industri dagang temuai kelimpah perengkaguna bukai baka hotel enggau palan bemalam.-TVS