BINTULU, 21 April: Tuai ba renggat baruh patut seruran beserakup enggau bekerejasama dikena nentuka pemansang ulih dipejalaika ungkup pengelantang komuniti besemak.
Kaban Kunsil Nengeri (ADUN) Kemena, Dato Sri Dr Stephen Rundi Utom madah, nya endang tanggungpengawa ketuai ba genap renggat dalam negapka kaul enggau ngempung komuniti ngambika enda pambar.
Ku Rundi, bida penemu enggau pangan diri enda patut nyadi kebuah pambar sereta ngeruga kaul ke udah lama ditanggam.
“Nyadi pengawa kitai diatu, kitai mesti bekerjasama.
“Kita enda ulih gawa kediri mesti bergumpul laban enti kitai begumpul dia kitai deka kering agi.
“Tang kitai pambar nyamai orang ngalah ke kitai,” ku iya.
Iya mansutka jaku nya ba Pengerami Makai Lemai Meri Basa diatur Adminstrasyen Bagi Menua Bintulu di sebuah hotel tebilang di Bintulu, Hari Enam.
Ku tandu Rundi, ambika banding dalam diri sebilik pan, bisi maya enda sepenemu kekadang bisi besengki penemu tang anang (belaya) selama iya.
“Anang ketegal kitai enda sepenemu kitai lalu pambar (ari pangan diri),”ku iya.-TVS