BETONG, 2 Mei: Urung 3, 000 temuai disadang datai ngerichahka Program Pelanda Baton Lumba Malaysia (SUKMA) Ke-21 Sarawak 2024 Renggat Bagi Menua Betong di Diwan Panglima Rentap Betong kena 9 June tu.
Chairman iya Alfred Geling Ason madah, program nya deka dipenyadika Sapit Premier Sarawak ke mega ADUN Bukit Saban Datuk Amar Douglas Uggah Embas.
“Pelanda tu deka dipejalaika ba penyauh 3.5 Kilometer berengkah ari Diwan Panglima Rentap ke Pasar Medan lalu nikal baru ngagai Diawan Panglima Rentap.
“Ungkup program tu kitai endang ngelaluka penatai mensia mayuh.
“Kitai melabaka urung 500 iku penyereta ngambi bagi ba pelanda nya taja kitai ngangau mayuh agi datai enggau ngerichahka program ke diatur ba Diwan Panglima Rentap,” ku iya.
Iya madah munyi nya pengudah tembu Aum Penyeraris Program Pelanda Baton SUKMA Ke-21 Sarawak Renggat Bagi Menua Betong ditu, empai lama.
Aktiviti bukai ke bela bisi diatur nyerumba program tu ila iya nya Demontrasyen Main Wushu, Taekwando, Silat, Nimbakka Laja enggau ke bukai.
Beduduk ari nya, iya nesau mensia mayuh bela sampal datai enggau ngerichahka program seraya ngangkatka pemanah nama Betong ba pekit nya ila.-TVS