DEBAK, 5 April: Pengerami Ramah Tamah Hari Raya endang pelasar pemadu manah dikena narak penyerakup komuniti.
Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam madah pengerami nya mega nyadi pelasar pemadu manah dikena negapka penegap politik di nengeri tu.
“Nya alai, nenama aja pengerami baik nya Hari Raya tauka Hari Gawai kitai endang patut neruska adat nya laban ulih mantu negapka agi penyerakup kitai enggau pangan diri.
“Arapka nengah pengerami tu iya ulih ngedut agi penyerakup enggau penegap politik ba Sarawak,” ku iya.
Razi ke mega ADUN Saribas madah munyi nya maya bejaku bejadika Pengerami Ramah Tamah Aidilfitri enggau Mantar Gawai Dayak 2024 diatur Kelab KMKK ditu, empai lama.
Ku iya, nengah politik ke tegap deka ngemuntangka agi semua langgur pemansang ke udah digaga perintah dikemujur enti dibanding enggau nengeri bukai.
Tandu iya, asil ari politik ke tegap mega ngujungka perintah Sarawak mujur angkat enggau bejalaika projek-projek besai ke meri pemaik ngagai rayat baka pengawa ngaga jematan enggau jalai raya tebing pantai.-TVS
