KUCHING, 5 April: Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar madahka, bisi lima Rang Undang-Undang (RUU) perintah deka dibantaika bala menteri nyerumba Aum DUN Sarawak ke berengkah pagila, 6 nyentuk 15 Mei tu.
Baka selama, aum serak tu ku iya madah, deka nyengkaum mantaika jaku ari Tuai Pemegai Menua (TYT), Yang Di-Pertua Nengeri Sarawak, Sesi Betanya Saut, Mantaika Rang Undang-Undang Perintah, Mosyen Basa Nuju Kedu TYT Nengeri Sarawak, Bejuraika Mosyen Basa Nuju Kedu TYT Nengeri Sarawak enggau Bejuraika Mosyen Basa Ngagai Jaku TYT Nengeri Sarawak.
Lima RUU tu iya nya Supplementary Supply (2023) Bill, 2024; Supplementary Supply (2024) Bill, 2024; Sarawak Port Authority Bill, 2024; The Protection Of Public Health (Amendment) Bill, 2024; enggau Sarawak Forestry Corporation (Amendment) Bill, 2024.
Supplementary Supply (2023) Bill, 2024; Supplementary Supply (2024) Bill, 2024; Sarawak Port Authority Bill, 2024; deka dibantaika Sapit Premier Sarawak Datuk Amar Douglas Uggah Embas ke mega Menteri Pekara Wang enggau Ekonomi Baru Kedua.
Udah nya, Sapit Premier Sarawak ke mega Menteri Penegrai Mensia Mayuh, Pengawa Berumah enggau Perintah Lokal Datuk Amar Dr Sim Kui Hian deka mantaika RUU The Protection Of Public Health (Amendment) Bill, 2024.
Sarawak Forestry Corporation (Amendment) Bill, 2024 deka dibantaika Sapit Premier Sarawak Datuk Amar Awang Tengah Ali Hasan ke mega Menteri Pengeraja Asal enggau Pemansang Mengeri Kedua.
”Bacha keterubah ungkup RUU nya deka digaga ba hari kedua Aum iya nya Hari Dua, 7 Mei 2024,” ku iya.
Ungkup Sarawak Port Authority Bill, 2024; The Protection Of Public Health (Amendment) Bill, 2024; enggau Sarawak Forestry Corporation (Amendment) Bill, 2024 bacha ti kedua kali enggau ketiga deka digaga Hari Dua, 7 Mei 2024.
Udah nya, ungkup Supplementary Supply (2023) Bill, 2024 enggau Supplementary Supply (2024) Bill, 2024, bacha ti kedua enggau ketiga deka digaga Hari Empat, 9 Mei 2024.
Ungkup mosyen ari Kaban Kunsil Nengeri dibaruh atur aum 23, naka haribulan kepenudi nganjung mosyen (10 hari sebedau aum berengkah) iya nya kena Hari Lima, 26 April 2024, Opis Kunsil Nengeri nadai nerima sebarang mosyen naka timpuh nya.
Aum keterubah ungkup penggal ketiga DUN Sarawak ke-19 deka dipejalaika pengelama 8 hari berengkah 6 nyentuk 15 Mei tu.
Aum nya deka dipungkal enggau jaku bejadika aum ti deka dikemujurka TYT Nengeri Sarawak, Hari Satu.
Sesi betanya saut deka diatur pengelama empat hari berengkah Hari Dua, 7 nyentuk 10 Mei 2024.
Aum serak tu mega deka ngemataka siti mosyen basa nuju kedu TYT Nengeri Sarawak ti deka dibantai enggau udah dipejuraika ba hari ke sama iya nya Hari Tiga, 8 Mei 2024.-TVS
