KUCHING, 5 April: Penuduk tiga iku kaban baru Parti Demokratik Progresif (PDP) maya Aum Kunsil Nengeri (DUN) ke berengkah Hari Satu tu deka diubah.
Speaker DUN Sarawak Tan Sri Datuk Amar Mohamad Asfia Awang Nassar madah, ketiga-tiga sida tu iya nya Kaban Kunsil Nengeri (ADUN) Bawang Assan Datuk Seri Wong Soon Koh, ADUN Ba’Kelalan Baru Bian enggau ADUN Engkilili Dr Johnical Rayong Ngipa deka duduk ba sepiak kiba Speaker DUN dalam blok perintah.
“Nya alai, tiga kedu kaban PSB ke diatu udah nyadi kaban PDP deka dipindahka ari blok penyakal ngagai blok perintah, duduk ba sepiak kiba Speaker DUN,” ku iya.
Iya mansutka pekara nya nengah aum media pengudah Aum Supreme Kaunsil Gabungan Parti Sarawak (GPS) ba Indu Opis Parti Pesaka Bumiputera Bersatu (PBB), kemari.
Wong Soon Koh, Dr Johnical Rayong Ngipa enggau Baru Bian udah masuk PDP enggau diterima PDP nyadi kaban komponen GPS.
Wong Soon Koh dipadu nyadi Mandal Presiden Kanan PDP, lalu Baru Bian enggau Dr Johnical Rayong Ngipa bela dipadu nyadi Mandal Presiden PDP.
Berebak enggau nya, lebuh nyaut senentang tuai penyakal ke baru, Asfia madah pekara nya deka ditentuka bala kaban DUN.-TVS
