KUCHING, 6 April: Pengawa ngatur Lumba Malaysia (SUKMA) 2024 ulih muka peluang ngagai anak Sarawak mandangka penau, bakat enggau pengelati dalam pengawa lumba.
Tuai Pemegai Menua (TYT) Sarawak Tun Pehin Sri Dr Wan Junaidi Tuanku Jaafar madah, laban ke nyadi tuai rumah SUKMA ungkup taun tu, nyadi nya diasaika siti basa ngagai Sarawak ngatur pekit lumba renggat nasional.
“Aku andal Sarawak ulih bejalaika tanggungpengawa nyadi tuai rumah ungkup pekit lumba pemadu besai di Malaysia.
“Aku ngarapka nengah SUKMA serak tu, atlit ulih mandangka rikod lati dikena ngangkatka nama Sarawak,” ku iya maya bejaku dikena mungkal Aum Keterubah Penggal Ketiga Kunsil Nengeri (DUN) Sarawak Ke-19 ditu tadi.
Iya mega mansutka jaku peransang ngagai kontinjen Sarawak ngambika ransing nengah semangat bemain ke tinggi enggau patut mandangka anak Sarawak ulih nabur jasa ukai semina ba renggat nasional tang mega antarabansa.
Semua raban bekaul dipinta meri kerejasama enggau besaup nentuka pemujur pegawa ngatur SUKMA Sarawak 2024.-TVS
