KUCHING, 9 Mei: Bazar Gawai Dayak 2024 naga teulihka asil manggai RM3 juta seraya ngarapka bazar nya ulih dilawa lebih 40, 000 iku temuai.
Sapit Menteri Pengangkut (Sungai enggau Tasik) Sarawak, Dato Henry Harry Jinep madah, raban pengatur andal mayuh agi aktiviti sereta program pemerindang beskala besai deka diatur ba palan Bazar Gawai Dayak 2024.
Bazar Gawai nya deka diatur ba MJC New Township Batu Kawa berengkah 16 nyentuk 26 Mei tu.
“Siti, palan ti lebih besai, endur ngengkah kerita besai enggau bisi kandang endur puang ba MJC ti ulih diguna kitai.
“Kelimpah ari nya mega, kandang endur ke besemak mayuh didiau komuniti dayak ba RPR Desa Wira, semak enggau Bau, Penrissen, kandang endur Bidayuh sereta komuniti Dayak,” ku iya nengah sebengkah Aum Media ke diatur ba Kompleks DUN Sarawak sehari tu tadi.
Tandu iya, bazar taun tu deka mantaika 180 iti bansal endur bedagang ti bekonsepka medan selera, ke alai mija enggau kerusi bisi disediaka dikena temuai duduk makai.
Kelimpah ari nya, komuniti lokal mega udah setuju deka meri servis nyaga pemeresi mija makai enggau gaya rampa bazaar nya.
Entara program besai Bazaar Gawai Dayak Sarawak 2024 nyengkaum Gawai Country Night, Gawai Idol 2024, Battle Of The Band, Malam Gawai Etnik enggau Sarawak Kids Got Talent.-TVS