KUCHING, 9 Mei: Institut Pemansang Tumpuk Pendiau (INFRA) nyendiaka peluang latih ti komprehensif enggau kus dagang ngagai komuniti menua pesisir ti deka ngepunka pengawa dagang ‘homestay’ tauka rumah temuai dalam sektor dagang temuai.
Tuai INFRA Pampang Sarawak, Dayang Monalizawati Abang Ismail madahka, kus pemun ‘homestay’ beguna dikena meri penerang, penemu sereta pengelandik pemun nyadi pengemeran ‘homestay’ sektor dagang temuai dikena nyungkak penatai pemisi seraya nyadi palan pematak destinasyen temuai.
Ku iya, kus tu mega siti penetap ke mesti diambi penyereta sebedau ngerejister ‘homestay’ ba baruh Opis Menteri Dagang Temuai, Seni enggau Budaya Malaysia (MOTAC).
“Setipikit INFRA deka diguna pengemeran ‘homestay’ dikena berejister enggau MOTAC seraya nya deka nyungkak ekonomi ba renggat pengemeran homestay.
“Taja pia, pengemeran ‘homestay’ patut ngulihka bantu ari MOTAC tauka ari perintah nengeri dikena ngemajuka dagang ‘homestay’,” ku iya rambau dirandau pengudah tembu Latih Pengelandik Homestay:Kus Pemun Homestay ke diatur INFRA Pampang Sarawak ba begunan INFRA, Kota Samarahan, Hari Empat.
Nangkan ke nya, Penulung Direktor Kanan INFRA Pampang Sarawak, Franky Mias madahka, pengempu ‘homestay’ patut nyikap diri enggau penemu dagang nguna pelantar digital nyengkaum nguasa Jaku English.
Pengemeran ‘homestay’ lebih agii iya ke baru patut nguasa ari sukut adminstrasyen, reti nya ari sukut dekomentasyen, rejister, marketing tauka chara promosyen homestay.
“Ambika banding, genturung pendiau nya bisi rampa menua ke manah, pemakai asal ti ulih matak temuai, sida patut nguna media rama dikena ngelakuka rumah temuai ngambika dikelala ukai semina dalam menua tu aja tang nyentuk ke menua luar,” ku iya.
Latih Pengelandik Homestay:Kus Pemun Homestay diatur pengelama tiga hari berengkah 7 nyentuk 9 Mei 2024.
Bisi 35 iku penyereta Kus Pemun ‘Homestay’ ti datai ari selampur Sarawak udah nerima setipikit tembu kus ti disuaka Tuai INFRA pampang Sarawak, Dayang Noralizawati empu.- TVS
