SIBU, 24 Mei: Statistik penusah aksiden ba jalai raya di Sarawak terus niki sereta ngirau ati iya nya mandangka penyampau kes bebadi nyawa ba taun 2023 niki dibanding taun sebedau nya bepelasarka ripot pemadu baru Polis Diraja Malaysia (PDRM) Sarawak.
Sapit Menteri Pengangkut Sarawak (Langit enggau Darat) Datuk Dr Jerip Susil madah, taun nyin kemari Sarawak ngerikodka 378 kes aksiden enggau penyampau naban nyawa urung 428 iku.
“Tu bisi niki sepenyampau 11.7 peratus, ari 9 ngagai 11 peratus, ari taun 2022 nyentuk 2023.
“Nyadi dalam erti jaku bukai ninting taun aku ngasai kitai melabaka bisi penambah kes bebadi nyawa…baka ke udah disebut aku tadi tebal agi nya laban deriba enda bejimat, berumban baban, semua tu beguna amat, kitai patut ngemeratka chara deriba ke mereti enggau nitihka atur,” ku iya.
Iya mansutka jaku nya maya Aum Media Program Kimpin Pengelikun Jalai Raya Renggat Nengeri Sarawak nyerumba Hari Gawai 2024 Bagi Menua Sibu di sebuah stesyen minyak ditu pagi tadi.
Ku iya, ripot nya nya mega madahka kebuah besai aksiden tu nyadi ketegal pengilap deriba iya nya ngerikodka 85 peratus ari penyampau semua kes.
Kelimpah ari nya, penyampau kerita ke majak mayuh ba jalai raya ngerikod 10 peratus ngujungka penyadi aksiden ditangkan ketegal gaya hari, pendiau jalai raya enggau ke bukai ke ngerikod lima peratus.
Dr Jerip madah, kenyau ari Januari nyentuk April taun tu, Sarawak bisi ngerikokad 7,153 kes aksiden ba jalai raya lalu 106 kes aksiden nya ngujungka naban ke nyawa.
Tandu iya, ba menua Sibu aja, bisi 734 penyampau kes aksiden dirikodka, nyengkaum tujuh aksiden nabanka nyawa lalu ari penambah nya patut bisi penyedar ngagai raban bekuasa enggau mensia mayuh.-TVS
