KUCHING, 6 April: Pemulai baru ngagai blok perintah diatu dibaruh Gabungan Parti Sarawak (GPS) deka diguna manah dikena mai mayuh agi pemansang ungkup rayat.
Kaban Kunsil Nengeri (ADUN) Engkilili, Dr Johnical Rayong Ngipa madah pekara nya nyadika cherita baru dalam pejalai politik iya.
Ngaku pengasai ba Aum Kunsil Nengeri (DUN) Sarawak serak tu baka selama iya madah diri chukup gaga laban ulih pulai baru dalam blok perintah.
“Aku gaga ulih pulai baru ngagai perintah, dibaruh iring Premier Sarawak kitai, ke diatu aku udah nyadi siku ari ADUN GPS, penuduk pan baka udah disebut Tan Sri Speaker udah ditukar.
“Enggau peluang tu aku deka naka ulih gawa ke rayat ba sitak aku lebih agi di menua pesisir, nulung perintah kitai, begulai enggau iring Premier ke chukup pegari,” ku iya.
Iya mansutka penemu nya maya dirandau TVS pengudah tembu pengawa muka Aum Keterubah Penggal Ketiga DUN Sarawak Ke-19 ditu, tengahari tadi.
Sebedau tu, Dr Johnical enggau dua agi ex-kaban Parti Sarawak Bersatu (PSB) iya nya ex-presiden iya ke mega ADUN Bawang Assan Dato Sri Wong Soon Koh enggau ADUN Ba’Kelalan Baru Bian nyereta Parti Demokratik Progresif (PDP) sepengudah PSB direrak.-TVS
