BETONG, 9 Mei: Palan Penyulut Teknologi Sarawak (CENTEXS) Pampang Betong deka bisi tiga agi program baru udah tu iya nya Kulinari, Pengawa Ladang enggau Hospitaliti.
Menijar CENTEXS Betong Andrew Emparan madah, kus nya dipelaba deka berengkah diajar ba CENTEXS Betong bulan Oktober tu ila.
“Kitai deka bisi nambahka program baru ke diajar ba CENTEXS Betong baka Kulinari, Ladang enggau mega bekaul enggau Hospitaliti tauka penganta.
“Nyadi tu antara program ti deka dipejalaika kitai ba CENTEXS Betong.
“Kitai deka ngemaruka penerang sepanjai maya. Program tu deka disediaka ngagai komuniti ke diau besemak enggau Betong, Sri Aman enggau Sarikei,” ku iya.
Iya madah munyi nya pengudah ngulu Pengerami Serumpu Aidilfitri enggau Mantar Gawai di CENTEXS Betong 2024 ditu, kemari.
Ungkup tuju nya, ku iya raban pengatur CENTEXS udah bejalaika pengawa ngaduka baru sekeda endur baka nambahka enam bilik kelas enggau sebuah diwan mayuh guna ungkup pengelantang raban ke belajar dia.
Nengah penambah nya mega,CENTEXS Betong deka ngembuan enam program nyengkaum Kus hidroponik enggau bejalaika kus Hikdroponik, bejait enggau elektrikal.-Foto:TVS
